本文重點
香港廠商會聯合會換莊，新會長黃友嘉元旦日上任。尋日係二○一○年第一個工作日，黃友嘉率領立法會議員林大輝、副會長羅富昌同今屆工展會大旗手施榮懷等一班領導層見記者，咁啱尋日又係工展會煞科日，大家傾起新一年嘅經濟情況，似乎都唔受煲呔曾嘅雙底衰退論嗰套。
今年工展會後勁凌厲，雖然初時有啲擔心天雨影響銷情，但最終有意外驚喜，入場人次及營業額都打破去年紀錄，施榮懷飲得杯落，亦反映市民消費力強勁。黃友嘉話，從工展會嘅銷情睇，香港喺金融海嘯後復甦相當不俗，估計二○一○年經濟漸趨穩定，本地生產總值可望有百分之三至三點五嘅增幅。
預計今年唔會雙底衰退
咦！煲呔曾話年中會有雙底衰退，黃友嘉咁講，咪同煲呔曾唱反調？擁有美國芝加哥大學經濟博士學位嘅黃友嘉就話，提雙底衰退論嘅人係特首身份，廠商會自然要審慎對待，絕對唔會掉以輕心。
不過，佢個人睇經濟唔會齋睇一年，而係睇未來兩、三年，事關各國政府退市係遲早嘅事，究竟過程是否順利、個人投資及個人消費能否接棒，仍是未知之數，不過佢估計，即使出現雙底衰退，都係二○一一年嘅事。到底煲呔曾同黃友嘉邊個眼光準啲？年中就可以揭盅！