立法會內務委員會將於本周五推選甘威調查委員會嘅七名成員，但到尋日截止報名，都只得經濟動力梁劉柔芬、民建聯劉江華、專業會議梁美芬同廠商會林大輝四名「鐵腳」交咗表，仲差三名議員先夠數。雖然議員原則上可以等到周五正式選舉時先即場報名，但由於泛民早已講明杯葛調查，曾被點名要求交人嘅工聯會同自由黨，亦都以不同嘅理由堅拒派人，點計都湊唔夠七名議員。

唔夠人開會 無限期擱置

立法會《議事規則》規定，按照譴責議員動議成立嘅調查委員會，一定要有七名成員，多一個或少一個都唔得。咁最後湊唔夠七個人又點算呢？秘書處即時答唔到我哋，話要交由法律事務部研究。曾經對甘威處境表示同情嘅林大輝就表示，如果真係冇人肯自願參加，就無謂夾硬屈人入會喇，不如乾脆終止調查放生甘威好過！

不過有熟悉《議事規則》嘅人士指出，規則訂明議員只能喺譴責動議提出當日，即場動議另一項議案終止繼續調查，但呢招已經畀旅遊界謝偉俊用咗，唔能夠再次提出，現階段冇其他方法可以叫停調查，因此即使調查委員會因為唔夠法定人數成立唔到，調查亦只算無限期擱置，唔算正式撤銷；只要喺本屆立法會餘下兩年多任期內，突然間又湊夠七名議員入會，整個調查同譴責程序又可以重新啟動。

如果上述分析正確，甘威嚴格嚟講仲未算甩到身，尤其係有五名泛民議員將會辭職，外界估計隨時有三至四人選唔番入嚟。如果新當選嘅建制派議員願意承接呢舊燙手山芋，重新啟動調查，到時泛民又唔夠人數否決譴責動議，咁甘威個議席就真係凍過水，仲危過依家即刻展開調查，當然，一切仲要睇立法會法律事務部本周五畀啲咩法律意見。