○九年股市埋單計數升多過五成，好多金魚缸友都賺到笑。卓妮除夕當日去上環陶源酒家食午飯，撞到京華山一證券行政總裁劉大貝，佢話全年賺過億，都飲得杯落啦！
劉總由台灣派嚟香港已經五年，佢話愈嚟愈鍾意香港，其中粵菜文化最得佢歡心。公司附近嘅陶源酒家零舍啱佢口味，佢對呢度嘅老火燉湯、潮菜小食最讚不絕口，曾經日日都喺度開飯，當正係佢飯堂添！卓妮記得台灣駐港機構、中華旅行社前任總經理張良任都好鍾意呢度。
嗰日劉總叫咗招牌燉湯「淮杞燉響螺」、冰燒三層肉，陶源靚女店長May姐又介紹咗幾味經典點心，有鮑魚乾蒸燒賣、鮑汁鳳爪等，襯晒佢哋鮑魚專門店嘅招牌。
May姐話，老闆全哥係廚師出身，好着重食物質素，所以佢哋喺中上環有口皆碑出晒名。
卓妮