本文重點
港隊一球踢開東亞運勝利之門，人氣「升呢」，連帶南華足主兼東亞運足球代表隊領隊羅傑承都進身星級班主。講到衣着品味，羅傑承話冬天佢首推Hermes茄士咩冷衫，貪佢毛質上乘超溫暖；太太梁芷珊就熱捧Hermes Birkin系列手袋，去到邊都挽住佢；立法會議員梁劉柔芬以舊Hermes絲巾自製成卡片套，全港獨家。
梁芷珊買Birkin手袋
Hermes品牌喺名人圈無人不曉，每次推出新手袋系列必令名媛淑女爭崩頭，佢嘅冷衫亦討人歡心。羅傑承早前出席港隊祝捷會就以淺綠色Hermes冷衫配襯Armani長絲絨褸。
佢話揀Hermes係太太梁芷珊嘅主意，皆因自己好少行街，買衫全由太太揸Fit。呢季Hermes出新款冷衫，領口位採用拉鏈設計，簡單中見型格，每件盛惠二萬二千九百元，羅太一於照買可也，難得Size啱晒身，羅生都讚老婆眼光獨到。
為老公扮靚後，羅太唔執輸，買入深紫色Hermes Shoulder Birkin系列手袋，專門店賣緊八萬一千五百元，貴過件冷衫三倍有多，不過羅太為老公裝身有功，使多少少錢，老公應該無詐型嘅，羅太喺祝捷會上挽新袋示人，兩公婆靚到絕！
蘇菲梁改裝卡片袋
Hermes粉絲無分年齡，同場嘅梁劉柔芬都係擁躉，佢喺手袋內抽出兩個自製卡片袋「晒冷」話：「我見條Hermes絲巾太細，一於發揮創意將佢變身，做咗兩個卡片袋，你話係咪好正呢。」Hermes絲巾至少賣二千幾蚊條，呢個卡片袋身價唔嘢小，好在蘇菲曉得物盡其用，乜都抵番晒嘞！
卓妮