公民黨同社民連早前喺立法會財委會討論高鐵撥款時大玩拉布，甚至連本身反高鐵嘅財委會主席劉慧卿都玩埋，令卿姐同所屬嘅民主黨都非常氣憤。卿姐日前應政府要求，諮詢議員應否喺下周五嘅財委會加會討論高鐵撥款，結果有二十九名議員支持、十八人反對，不過向來好重視少數反對聲音嘅卿姐，最終都決定破天荒連開三節合共六粒鐘嘅會議，開午夜快車審高鐵，同班拉布議員玩鋪勁。
首節財委會安排咗喺內務委員會結束後舉行，咁啱當日嘅內會亦有多項爭議性議程，包括選舉甘乃威調查委員會嘅七名成員、討論應否成立專責委員會調查「河蟹」事件、以及應否就內地公安涉嫌越境執法事件進行休會辯論等，每項議題閒閒地都傾成粒鐘，首節財委會肯定要押後到三點半先開波，第二節亦可能拖到七點幾至開到，開埋第三節就分分鐘傾到凌晨十二點，打破歷來最長同最夜財會紀錄。