五人集體行動，身為主人家嘅大輝率先消費百二蚊，喺泰昌餅家買咗十包龍鬚糖，之後一行人就去咗救世軍嘅攤檔。議員陳健波買咗五個相架，每個盛惠五十八蚊，陳茂波就揀中二百幾蚊嘅手鏈一條，譚偉豪更加唔貴唔愛，睇中獨一無二嘅手織頸巾，仲快快手攬上頸，然後推介畀其他四散人。結果五散人以示齊心，一齊以比原價貴廿蚊嘅五百蚊，一人買一條。之後五散人再去農圃，由大輝請客，一嘗碗仔翅同埋燕窩蛋撻，譚偉豪就繼續豪爽，買咗隻五百五十蚊嘅南非鮑魚請大家食。

梁鳳儀買港產智能煲

繼五散人後，財經事務及庫務局副局長梁鳳儀Julia都去工展會捧場。尋日Julia消費咗一千一百幾蚊，主要買咗個本地品牌嘅智能煲，Julia貪其可以煲粥煲湯兼燉嘢，但係佢笑言自己飲就叻，煲嘅工作留番畀工人啦！此外，佢仲買咗廚房用嘅膠盒，同埋有老虎公仔嘅冷氣被，叫做交咗功課。