煲呔曾早前去工展會做消費騷時，聲言今年唔使再刺激經濟，但日前畀中央領導人當面訓斥佢金融海嘯未過去後，佢又突然改口話唔排除香港會出現雙底衰退。阿Paul尋日向傳媒直言煲呔曾明顯係畀領導人鬧完先至轉口風，但結果就係一錯再錯。

懶理貧富懸殊 民生問題

阿Paul解釋，早幾個月香港股市同樓市升到嘭嘭聲時，佢同好多財經界朋友都認為外圍經濟仲存在好多隱憂，港府唔應該先天下之樂而樂，咁快宣稱經濟最壞情況已經過去，進一步刺激資產泡沫，反而去到最近個零月，各國政府都表明唔會咁快一刀切退市，大家都認為經濟再沉底嘅機會極微時，煲呔曾又忽然變番做大淡友，真係笑死班專業人士。

對於煲呔曾死撐領導人明令佢解決嘅深層次矛盾，純粹係指經濟轉型，阿Paul認為肯定唔止咁簡單，最少仲包括貧富懸殊等社會民生問題，最大鑊係煲呔曾政府根本唔肯承認呢個係一個問題。

本身代表會計界嘅阿Paul又指出，綜合最新嘅經濟數據、樓股成交、賣地結果同上市公司業績，會計界幾乎一致認為本年度港府即使未能轉虧為盈，赤字亦會大幅少於預期，但鬍鬚曾日前仲死撐財赤嚴重，如果唔係會計數學攞零分，就係刻意為來年預算案拒絕派糖紓困鋪路。

阿Paul認為以現有嘅五千億儲備水平，港府絕對有能力再加碼紓困，但每次佢同鬍鬚曾討論有關問題時，對方都反問佢有乜方法幫政府收多啲稅，令佢非常無癮。佢認為鬍鬚曾最錯嘅，係喺早兩年形勢大好時，將「由天跌落嚟」嘅上千億盈餘一次過派晒，以及為咗兌現煲呔曾嘅親商競選承諾，調低利得稅同薪俸稅標準稅率，向一小撮大商家同打工皇帝送大禮。

如果鬍鬚曾當年肯審慎啲，依家港府就會有大把彈藥應付多幾波金融海嘯，唔使扮窮慳住唔敢使錢啦。