本文重點
戴錶可以反映一個人嘅性格，保安局副局長黎棟國就經常精工錶不離手，事關隻錶係太座喺七、八年前去日本旅行買畀佢嘅，屬於「愛夫錶」，唔可以唔戴，隻鋼帶錶望落實而不華，雖然係舊款又唔算名貴，但黎Sir話好鍾意隻錶，事關貪佢夠準，仲好大方畀卓妮影佢隻錶。
環保智能 自動校時
隻錶面寫明「KINETIC AUTO RELAY」，根據內地精工網直譯，即係「人動電能，智能時控」，黎Sir話隻錶係靠戴錶者擺動產生電能並儲存，不用電亦不用上鏈，「冇戴放低，再戴番，佢會自動校準番時間！」黎Sir估計，隻錶入面應有自動計時功能，所以可以自動校時，睇嚟隻錶既環保又智能，啱晒啲大忙人。
黎Sir曾退休一段時間，經常與太座有影皆雙，得閒同啲老友飲吓茶，依家黎Sir重出江湖，黎太咪好悶？佢就話唔使憂，事關黎太好多嗜好，又畫畫又學書法，一啲都唔會悶，佢就可以放心全情投入保安局。
卓妮