晏紫尋日喺尖東洲際酒店筵開四十幾圍，由於男家係福建富商，「福建幫」頭領兼全國政協委員盧文端賞面到賀，原來盧生由細睇住新郎哥長大，見證對方抱得美人歸。立法會議員陳克勤都有份飲喜酒，佢自爆大學參加聯校活動時認識新郎哥嘅兄長，彼此同屬福建人，友情維繫至今。新郎李聖根話喜歡低調，婚禮唔想太鋪張，亦講明「免收賀禮」。

嫁入豪門嘅晏紫堅持婚後照樣打波，老公都大表支持喎。 （資料圖片）	陳克勤同新郎哥兄長係老友，尋日賞面嚟飲番杯。	盧文端大讚新郎哥追到個國寶級太太，非常叻仔。

「愛要執着」劈開冰山

晏紫全程配合老公，穿着簡潔婚紗，配上鑽石耳環、頸鏈及鑽戒，未見大晒行頭。查實呢對新人早前已先後喺男方老家石獅嘅農村及深圳擺酒，尋日輪到香港，嚟緊仲喺成都擺多一餐，結一次婚要走勻四地，夠晒忙。

李公子尋日喺婚宴上怕怕羞羞，原來佢追女招數非常大膽，初次約女方食飯時已大膽示愛，點知晏紫大派檸檬，明言「對不起，我不想找商人做男友」，嚇到李公子呆咗，亦因此認定晏紫唔貪錢，追得過，於是發動追女攻勢，化身做綽號「愛要執着」嘅小粉絲，不停喺晏紫網誌上留言，呢吓「骨痹」舉動令伊人冧到極，一年後佢兩個開始拍拖，仲開花結果添。

嫁入豪門萬事足，晏紫應該興奮過攞奧運金牌，不過伊人講明婚後唔會離開網球，目標直指明年亞運及二○一二年嘅倫敦奧運。婚後，晏紫將移居香港，入住老公豪拋逾千萬購入嘅元朗加州豪園豪宅，做其香港新娘。香港又多個「國寶級」新抱，狗仔隊又有排煩嘞。

卓妮