特區政府有時都唔算過分麻木不仁嘅，你只要瞄準八月十五狠狠踢佢一腳，官老爺有時真係會有反應㗎。譬如話，中環有幾位伯伯卑躬屈膝以擦鞋謀生，日日擔驚受怕恐防冷血官僚又拉又鎖，經過輿論仗義執言一腳伸過去，食環署終於從善如流，發牌畀擦鞋伯伯合法搵食。又譬如話，經過三十六年之後，俗稱「雪糕仔牌」嘅流動小販牌照（冰凍甜點）解凍嘞，等三餐不繼嘅小市民可以賣雪糕賺錢餬口。

之不過咁，從善如流唔代表擇善固執，發牌畀你做生意唔代表放條生路過你行。食環署係就係發出六十一張雪糕仔牌，可惜轄下嘅販管隊依然趕絕雪糕仔。稍為有少少安慰嘅係，香港販管隊嘅野蠻程度始終比唔上內地同樣管理小販嘅城管，冇話郁啲就打人，更加冇話一打就瓜柴。

販管隊點樣野蠻呢？即係咁，有一位五十三歲嘅朱先生，好好彩從三千幾個競爭者之中抽籤獲發雪糕仔牌，諗住呢鋪行運啦，即刻去學車，然後買入二手雪糕電單車，甚至參加工會舉辦嘅培訓課程。躊躇滿志開檔嘞，弊！販管隊兇神惡煞冚檔！

食環署話喎，朱先生擺檔嘅尖沙咀天星碼頭鐘樓係「小販黑點」，雪糕仔對行人構成阻礙，所以有必要趕佢走。問題係，發牌條件根本唔存在所謂「小販黑點」，冇列明禁止販賣嘅具體位置，執法人員有生安白造之嫌。朱先生據理力爭拒絕離開啦，哈，已經人多勢眾包圍雪糕仔嘅販管隊居然吹雞報警喎。雖然警察了解過之後都唔覺得有問題，不過販管隊仍然堅持要檢控，一條罪名係「有牌小販阻街」，另一條罪名係「售賣無牌照准許食物」。

唉，做小販啫，搵兩餐啫，使唔使趕到咁絕呀？功夫茶真係唔明，你驅趕無牌小販就話職責所在啫，人哋攞正牌照㗎，點解屈得就屈？再講吖，香港有牌小販從來都係稀有生物，又唔係六十一個雪糕仔一次過戙晒喺天星碼頭鐘樓，一個有牌小販有幾阻街呀？

從現場圖片所見，功夫茶可以好中肯咁得出一個結論：孤伶伶一千零一個雪糕仔完全唔阻街，反而無風起浪惹來大批群眾湊熱鬧圍觀嘅販管隊，唔止阻街，簡直阻住地球轉！

野蠻執法者永遠係小市民嘅公敵，因為行走江湖最犯眾憎嘅就係阻頭阻勢阻人搵食。冇辦法嘞，家陣為口奔馳太艱難，實在有必要為民請命，唔該蠻官趷高八月十五，等功夫茶一腳伸去火星，畀機會地球正常運轉。