煲呔曾份人頭腦並不算複雜，樂天知命，滿足於現狀。佢接受電視訪問，笑到你死！如果老朽呢種小民，喺銀包騷張觀世音像或一道符，話可辟邪解厄，相信冇人會覺得突兀，之不過，堂堂特首話畀全港市民知佢攞張德蘭修女像來避蕉，你話過唔過癮！佢又話自己去朝聖時，攞本筆記簿做記錄冇問題，咁啱入鏡畀人影到啫！反之，中央領導人亦有將佢啲意見筆錄，只不過唔入鏡，自己都覺得好光榮！
煲呔曾示範了積極的人生觀：凡事往好處想，黑夜都見到曙光！難怪佢「身在夾縫之中」，仍晚晚睡得香甜，夜來風雨聲，理鬼你有幾多長者按平安鐘。回歸以來，本港除有過百萬貧窮基層外，還有不少青年和高知識貧窮現象，政府坐視不理，則社會難得和諧，怨懣一化成星星之火，可以燎原也！
煲呔曾話自己由○五年上任至今，民望不算差，已經很好運。既然咁知足，抵佢常樂！不過，他在新加坡接受記者訪問時，又話自己最後悔「做咗特首」！豐衣足食都後悔，那麼在貧窮線上掙扎的百姓，敢問煲呔曾：佢哋豈不是全部要投奔怒海？
日本東京一家洗髮水銷售公司，公布關於首相鳩山髮型的網絡調查結果，他獲得了百分之六十二的高支持率，該公司分析原因：與同齡人相比，鳩山的頭髮相對濃密，讓人有一種清潔感。老朽無聊，把煲呔曾的照片拍埋鳩山的上半身照，然後用放大鏡觀照對比，發覺煲呔曾的頭髮相對更濃密，若與同齡——六十五歲的長者相比，更加無敵，加上煲呔曾衣冠楚楚，金勞閃耀，其民望應升至百分之九十九才合理！