西九管理局諮詢會主席張仁良尋日出席最後一場西九諮詢會，罕有咁摘下眼鏡，令人耳目一新，以為佢想配合諮詢對象係年輕人，刻意打扮得後生啲，一問之下原來係因為佢剛剛做完左眼嘅白內障手術，換咗人工晶體後連近視都無埋，不過佢講笑話就算右眼做埋手術都唔可以真正脫離四眼一族，仍然要老花眼鏡傍身，一係就要拖實老婆先得喎。
張仁良嘅手術由身兼全國人大嘅林順潮操刀，為免雙眼一齊受感染，所以分開兩次做手術。張仁良話手術時睇住手術刀拮埋眼好驚，尤其係佢嘅手術亦係教學示範，林醫生一邊做一邊同學生講解過程，就令佢驚上加驚。
至於有六百幾度近視嘅右眼，張仁良就話暫時要戴住隱形眼鏡先，手術會喺下個月七日進行，啱啱就係西九文化區第一階段諮詢嘅截止日期。張仁良話今次諮詢反應已超過預期，暫時收到二千幾份問卷，之後要分析意見，相信會有排忙啦。