就嚟到聖誕節，又到香港人出外旅行嘅熱門日子，就連一眾高官都話要放假抖吓氣，其中保安局局長李少光遲啲都計劃放假，不過都係返內地打高球，唔會去得好遠。泰國包機事件令佢變成驚弓之鳥，就算依家有副局長黎棟國幫手，有長假佢都唔去遠行。
發生泰國包機事件嗰陣，光哥仲喺日本公幹緊，結果保安局無人可以擔大旗，救援行動慢人哋十拍，差啲令成個特區政府陷入嚴重管治危機。雖然今年十月黎棟國上任保安局副局長，就算光哥唔喺香港，一個唔該發生大事故，保安局都未至於擺空城計，但睇嚟光哥都係寧願親力親為，只係敢短短放四日假，就算去遠啲都唔敢，方便有咩事即刻飛返香港主持大局。
至於新年願望，光哥同人講話最緊要係驗毒成功，可見驗毒計劃係只許成功不許失敗。其實佢同黎棟國都分咗工，驗毒屬於副局長嘅工作範疇，可見驗毒做得好，正副局長都無煩憂。