本文重點
公民黨同社民連力撐嘅五區總辭，畀其他反對嘅泛民主派形容做「自殘方案」，未傷到人先傷自己。兩黨上個星期五再次聯手，喺立法會財委會討論高鐵撥款時大玩拉布，最後迫使撥款押後到明年初再表決，原來都係另一種形式嘅「自殘」行為，隨時連累立法會新大樓工程出現延誤，最後又係玩番自己。
阻醫院地區活動新大樓撥款
財委會原定喺上周五表決完三項高鐵撥款之後，再討論三項冇乜爭議撥款申請，包括北大嶼山醫院首期工程、民政署嘅多元化地區活動、以及新立會大樓嘅IT設施撥款。兩黨如果喺財委會下月復會後繼續玩嘢，阻撓高鐵項目表決，亦等同無限期押後排喺後面嗰三項撥款，其中北大嶼山醫院就得罪新界西選民，對計劃辭職喺該區嘅社民連陳偉業最不利，多元化地區活動撥款更加全港十八區都會得失晒，等於同自己倒米。
至於新大樓IT撥款，影響嘅主要係議員自己，不過如果兩黨派出嗰五名死士，最後喺五區補選中輸晒，咁就點都享受唔到新大樓嘅先進IT設施喇！唔知佢哋係咪早已打定輸數，先至把心一橫決定大玩拉布呢？