睇番佢哋之前嘅財政報告，公民黨幾乎年年無錢剩。今年五月，佢哋位於灣仔嘅總部加租八千蚊，公民黨已經無錢畀，最後要由甲級寫字樓搬去北角嘅工廠大廈。不過公民黨內部人士就透露，大大聲話要總辭嘅議員，到依家仲未傾過經費問題，又未有計劃搞籌款活動，黨內人人都唔明點解佢哋咁老定。

兩人辭職唔見五百萬

如果按佢哋嘅計劃，陳淑莊同梁家傑分別喺港島同九龍東參加補選，競選經費上限，總數達三百幾萬。唔單止咁，依家立法會議員月薪有六萬九千幾，每個月可以拎到嘅實報實銷津貼，例如辦事處營運費、酬酢同交通津貼等，加埋用公帑幫佢哋買嘅醫療津貼，每個議員每個月都拎走廿二萬幾公帑。如果公民黨派兩個人辭職，就算佢哋最後真係全部選番入議會，都起碼有五個月無收入，即係無咗二百幾萬！一來一回，公民黨要搵番五百萬先夠補番條數，點計都係蝕。

公民黨內部就指，個個議員咁老定唔籌錢，其實得兩個可能。第一就係佢哋為求辭職造勢，不擇手段不理現實，諗都無諗過錢銀嘅問題，就決定唔理成本點都要去選。

至於另一個可能，就係佢哋喺總辭之前已經搵定條大水喉照住，所以先心口貼住個勇字，無畏無懼死都要衝。不過無論邊個可能性都好，總辭一成事，補選要用嘅一億五千萬公帑點都走唔甩，廣大市民必輸！