本文重點
香港足球代表隊喺東亞運一夜成名，隊員「升呢」做球星外，荷包亦脹卜卜，合和主席胡應湘（哥頓）尋日以足總名譽副會長身份搞慶功，捐出十萬銀獎勵球員。查實哥頓係港足半個伯樂，喺東亞運開賽前已自掏腰包送球員去克羅地亞特訓兩星期，港足奪金，哥頓都應記一功。
梁孔德擬籌數千萬搞特訓
哥頓平日滿口生意經，好少將足球掛口邊，原來佢唔聲唔聲支持港足多年，早喺六十年代已擔任南華會主任，最大嗜好係踢波，仲專踢前鋒。講起踢波，哥頓特別興奮，自嘲射十二碼唔及陳七陳肇麒醒，但球場以外佢為港足開路，兩年前禮聘克羅地亞球隊教練來港擔任港隊總教練，力谷球員體能及球技，令整隊波脫胎換骨，今次吐氣揚眉，哥頓一於派錢振奮士氣，尋日同太太胡郭秀萍及公子胡文新喺合和中心嘅旋轉餐廳頒贈支票，仲特製咗一個巨型足球大蛋糕慰勞球員。
慶功宴上，足總主席梁孔德、議員太太梁劉柔芬、東亞運足球代表隊領隊羅傑承及太太梁芷珊都係座上客之一。梁孔德為港足仆心仆命，開賽前曾因過度勞累感染肺炎入院，一度發高燒，不過當睇見球員捧盃，乜病都唔記得晒。
港隊奪冠後身價急升，不過波係圓嘅，轉頭輸番都未定，所以梁孔德計劃為港足成立基金，目標籌款數千萬元，誓要特訓呢班精英，再創傳奇。
不過喺未接受地獄式訓練前，球員要先學識面對蜂擁而至嘅「粉絲」，祝捷會上，經濟動力成員林健鋒及梁君彥都爭住同奪金功臣「陳七」影相，出咗名，果然零舍唔同。
卓妮