阿涂早前喺立法會派餅，畀人問佢幾時會派紅雞蛋，當時怕醜仔面紅紅話問題敏感唔答，不過又話結婚生仔係人生大事，大家似乎都好想快啲見到阿涂做爸爸，所以尋日當牧師宣讀經文到其中一句「生養眾多」嘅時候，全場即時起哄，唔知涂生涂太會唔會坐言起行「造人」呢？

雖然成個婚禮都充滿笑聲，不過當一對新人上台致詞嘅時候，講到二人相戀過程，原來並唔係咁順暢。阿涂話初初拍拖都好驚，因為好擔心自己嘅政治立場同背景女方家人唔接受；阿Sue亦坦承有呢方面隱憂，因為佢爸爸有濃厚鄉情，閒來愛回鄉探親，但點同爸爸講自己要嫁一個無回鄉證嘅男人呢？將來點回鄉擺酒呢？

幸好最後佢哋都得到家人嘅接受，締結良緣。尋日好多政府高官及議員都去捧場，商界就見到信和置業主席黃志祥及黃永光父子。