本文重點
今次「Art in Use：Sculptural Objects」雕塑展，由藝術中心監督團主席包陪麗擔任藝術顧問，前日開幕請到教育局局長孫明揚及滙豐私人銀行亞洲行政總裁王以智等擔任主禮嘉賓。包陪麗同王以智嘅衣着品味在名媛界出晒名，卓妮見包陪麗一襲連身裙嘅裙身肩膊位置鑲有皮草，飾物就戴上鑽石手鏈、戒指及Dior Christal鑲鑽手錶，行頭相當勁。
包陪麗拍住孫公玩
王以智着咗件深色絲絨上衣及西褲，外套則配以意大利Blumarine皮草背心，手持鱷魚皮包，配搭天衣無縫，但王以智在主禮期間卻除去皮草外套。同場卓妮仲見到前東華三院主席馬清鏗（Patrick），見佢西裝骨骨，身材都好Fit吓，問佢平時去邊度造西裝，Patrick好怕醜話唔想講，只係肯話平時家姐會幫佢留意邊度有靚衫，即時通知佢去入貨喎。
今次雕塑展睇得又玩得，孫公拍住包陪麗四處遊覽，坐在內地藝術家祝曉峰嘅展品《假雲》上合照，又一齊輕輕蹲下站在一個精緻嘅愛斯基摩半圓形菱鏡雪屋內，動作生鬼又有趣。孫公似乎愈玩愈過癮，仲獨自騎上電單車展品及藤製單車，非常威風！