本文重點
早前主管過青年工作嘅中央領導人訪港期間，曾經會見香港青年團體代表，一班富豪二代、青年才俊個個西裝骨骨打晒呔，但唯獨香港青年聯會副主席、金谷科技總裁秦善文（Samuel）着得好Causal。相信大家對Samuel唔會陌生，佢就係近期買「天匯」豪宅熱爆全城、由木屋區窮小子變身企業家嘅傳奇人物。
「我都想同佢Friend」
年僅四十二歲嘅Samuel，本周日（六日）以青聯副主席身份，與一眾才俊參與國務委員劉延東嘅接見，佢喺會面前後非常活躍，與多名賓客言談甚歡，期間曾與多位前香港青聯主席霍震寰、王敏剛、黃定光及分屬老友嘅曾智雄有傾有講，在政圈中嘅活躍程度可見一斑。
六個單位 陸續放盤
Samuel十月以成交價十一億六千萬元掃入六伙西半山干德道豪宅天匯，創出呎價七萬一千三百元天價，結果一石擊起千重浪。事隔個幾月，卓妮周日喺劉延東會面嘅場合見到Samuel，梗係追問佢有關天匯「綑綁式銷售」一事，佢首次開腔承認，確實買咗六個天匯單位，但佢就話買樓與恒基地產主席李兆基（四叔）完全無關：「今次肯定百分百同四叔無關，我都想同佢（四叔）Friend呀！」
Samuel仲同卓妮講，六個單位已陸續開始放盤，但唔肯講開價幾多，總之開價會高過買入價，保證唔會蝕錢，仲話如果有機會嘅話，部分留為自住都唔出奇喎！但問到背後係因為有大老闆支持、抑或只係擔當海外買家代表，Samuel就無再講落去喇。不過，四叔早前已表明，Samuel只係買家授權作為簽署代表，真正買家為海外客。
Samuel出身傳奇，由出身木屋區窮小子變身企業家，○二年曾任新城電台節目唱片騎師，為聽眾解決愛情煩惱，其後又加入香港青聯，與一班富豪二代混熟，當中與領呔大王曾憲梓二仔曾智雄較為老友，Samuel曾擔任曾智雄嘅婚禮司儀，老友鬼鬼。
卓妮