財政司司長鬍鬚曾亂嘥公帑大搞個人形象工程嘅新一輯預算案電視宣傳短片，尋晚出街。鬍鬚曾聲稱N.G.咗成日嘅宣傳片，原來抄幾十年來經典老套電視廣告「愛膚堅」嘅舊橋！
短片共分為三個小段，第一段描述一對阿叔同阿嬸喺茶餐廳歎茶吹水。阿叔話「民生福利好啲，我哋就受惠多啲喇」，阿嬸就回應話「不過要應使則使喎」，此時坐喺阿叔後面嘅鬍鬚曾，就突然擰轉頭望住兩人傻笑，嚇到佢哋差啲倒瀉奶茶，疑似經典電視廣告內嘅爆笑對白：「對唔住，香港腳發作……用『愛膚堅』喇！」
睇晒三個片段，其實講鬍鬚曾無處不在，無論學生玩緊西洋劍擊又好，文員喺辦公室影印緊又好，佢哋講緊對預算案嘅意見，鬍鬚曾都會忽然間好似攝青鬼咁攝出嚟，片中嘅學生同文員，都畀佢嚇咗一跳。其實最緊要係鬍鬚曾唔好喺預算案宣布大幅加稅，如果唔係，就真係嚇全港市民一跳嘞。