港區人大代表馬豪輝上周六嫁女，專業會議立法會議員石禮謙啱啱做完通波仔手術冇耐，都好畀面拖埋女友Lisa去恭賀一對新人。
大舊石一向係潮州菜嘅粉絲，佢同卓妮講，要喺香港食到正宗潮州風味，非上環尚興潮州菜館莫屬，仲大讚尚興嘅「螺片冇得頂」。一睇大舊石嘅身形就知佢識食，白灼螺片係尚興嘅招牌菜，盛惠二百五十元一片，大舊石就話物有所值。螺片有補腎養肝作用，愈大隻功效愈好，所以大舊石多吃無妨。
講番尚興，雖然裝潢一般，但勝在老字號，攞得出嚟招呼客人嘅都係好嘢，凍蟹、潮州翅、豆瓣雞、川椒龍蝦球……食過嘅都讚口不絕，唔少明星都係尚興擁躉，好似藝人郭富城早前生日就係喺尚興食翅慶祝，政界名人好似教育局局長孫明揚夫婦、醫管局主席胡定旭等等，都係尚興嘅捧場客。
卓妮