榮升爸爸嘅黃永光人逢喜事精神爽，前晚出席「博鰲青年論壇」酒會時不忘報喜，宣布BB已喺十一月二十七日出世，精靈可愛又夠分量，遺傳晒爸爸同爺爺嘅強壯體魄，黃永光一提BB就笑到見牙唔見眼，卓妮提議佢同BB一齊賣奶粉廣告，實氹死唔少媽咪。不過講到最興奮嗰位，仲係已屆八十一歲嘅太爺黃廷方。

黃永光早前與腹大便便嘅太太，出席鄭裕彤長子嫡孫鄭志剛嘅晚宴。（資料圖片）

黃永光（左）做老竇，黃志祥（右）榮升爺爺；中為黃永光細妹黃敏華。 （資料圖片）

老友紛紛排隊奉上賀禮

貴為新加坡地產大亨嘅黃廷方係新加坡遠東集團創辦人，今年九月再次冧莊，榮登美國財經雜誌《福布斯》○九年「亞洲新加坡富豪」榜首。如今曾孫出埋世，為黃家創下「四代同堂」紀錄，完美到極，難怪太爺要親自幫曾孫改名，取名「家寶」，視BB為全家之寶。

家寶深得長輩歡心，暫時未知黃家會否擺滿月酒，不過同黃永光老友鬼鬼嘅兄弟就排緊隊送賀禮，菁英會副主席盧金榮話，諗住送BB用品做賀禮喎。

黃友嘉搵唔到酒店就職

另一邊廂，廠商會都有另一樁喜事，黃友嘉當選新一屆會長後，話咁快一月一日履新，不過David前晚出席東亞運「中國之夜」晚宴時同卓妮講，就職禮被迫推遲。何解呢？佢就扁嘴話，各大酒店都爆晒棚，想Book期都難，幾經辛苦終搵到洲際酒店，仲要推遲到二月九日先至舉行就職禮，唔知係咪今年雙春兼閏月喜事多。

自嘲為「神經富豪」嘅牛仔褲大王楊釗都同太太拖手仔撐「中國之夜」，楊釗夫婦都係虔誠佛教徒，太太經常夫唱婦隨，陪佢出席宗教活動，幫佢打點一切，怪不得楊釗同卓妮講，人生除咗名和利之外，家庭和健康更為重要；有咁嘅老公，夫復何求！

各大酒店生意太好難Book場，黃友嘉（右）嘅就職禮被迫推遲到二月九日舉行，旁為黃友嘉太太。

自嘲「神經富豪」嘅楊釗（左），同太太拖手仔出席「中國之夜」晚宴。

卓妮