剛接任港大校務委員會主席嘅梁智鴻，原來滿腹大計，佢話：「依家我哋排名二十四，可唔可以排二十、排十呢？」好！有志氣！假如港大能夠成為全球十大學府之一，直情要放煙花慶祝！

問題係，打機「升呢」就話容易啫，大學「升呢」似乎難度相當高。好似高錕咁吖，係就係攞咗諾貝爾獎為港爭光，但係呢位光纖之父始終要喺外國嘅學術環境先至可以發光發熱，土生土長嘅學術人才暫時未見震驚世界嘅偉大突破，港大又憑乜嘢更上一層樓呢？

照梁智鴻嘅講法，港大必須思索未來發展路向，唔可以食老本，唔可以閂埋門坐井觀天，而由於香港「冇地方、冇研究經費」，限制咗發展空間，所以港大積極打入內地。除咗會喺深圳濱海設立由港大管理嘅醫院，亦會成立牙科診所、科研中心以及校園，期望未來可以申請內地嘅研究經費，並且成為內地重點大學之一。

呢嗱嗱嗱，咁就死火嘞，如果連首屈一指嘅港大都話「冇地方、冇研究經費」，咁香港其他大學咪好大鑊？唔知大家點諗，功夫茶即刻諗到四個字：教育產業。

喂，記唔記得曾蔭權嘅施政報告大吹大擂發展六大產業？記唔記得教育產業係其中之一？家陣百年老店都嫌唔夠地方同經費畀佢哋大展拳腳，借問聲，香港憑乜嘢打造教育產業？

講到呢度，功夫茶諗起一單新聞。有五個科技大學嘅一級榮譽高材生，攞咗獎學金去沙特阿拉伯深造，知唔知五個香港學生哥有乜嘢待遇？入住千呎豪宅，三年有五十四萬津貼，可以免費使用遊艇，又可以打高爾夫球。嗱，人哋沙特阿拉伯先至叫做打造教育產業吖嘛，不惜工本吸引海外人才。反觀外地學生來港就讀咯喎，莫講話冇得你住千呎豪宅，求求其其有一間豆腐膶宿舍畀你住已經叫做執到，點同人爭呀！

講開一房難求，梁智鴻忽發奇想：「可唔可以將工廠大廈變為宿舍？」唉，你話吖，連學生哥嘅瞓覺問題都未解決，曾蔭權嘅教育產業睇怕都係另一個有姿勢冇實際嘅吹水傑作。

吖，唔知係啱啱遇着剛剛定係點呢，國務委員劉延東尋日參觀港大醫學院喎，佢提到內地教育要發展得好，首先要加強同香港高等教育嘅合作。劉延東又話，國務院即將制訂至二○二○年嘅教育改革與發展規劃綱要，港大辦學理念先進，又係一間綜合性研究型嘅世界一流大學，人才培養以及科學研究有豐富經驗，所以應加強與內地合作，共同提升中國教育水平。

死啦，本地所謂教育產業隨時又會好似老董嘅乜乜中心物物港咁樣噏完一輪即報廢，苦無經費嘅龍頭大學焗住要北上發展，香港大學日後會唔會改名叫做中國大學㗎？