身兼中央港澳工作小組副組長的國務委員劉延東旋風式訪港兩日，尋日密集式見人，由朝跑到晚，其中一站係參觀香港大學饒宗頤學術館，拜會國學大師饒宗頤。佢讚揚饒老對中華文化貢獻良多，所謂「南饒北季」，北京嘅學術泰斗有今年逝世嘅季羨林，南方就以今年九十三歲嘅饒宗頤做代表，佢仲話饒老好似大熊貓添，唔好誤會，唔係指饒老有黑眼圈，而係形容饒老同大熊貓一樣，都係國寶。
劉延東尋日節目排到密麻麻，九點未到，成班富豪輪流抵達紅磡海逸酒店見面。之後，劉延東外出參觀港大回來，下午三點又同十間高等學院嘅校長見面，然後再去會展，會見香港青年團體代表同出席○九年博鰲青年論壇，呼籲香港青年愛國愛港，集中精力發展經濟，稱正在制訂嘅十二五規劃，會研究香港同澳門喺國家改革中嘅功能定位同機制，希望港澳把握機遇咁話。