05/12/2009

播放本新聞相關短片

政情:李殷泰:水晶纜車求婚掂

飛機客艙有分經濟同頭等,連纜車都要豪裝吸客。昂坪360尋日推出「空中貴賓廂」,車身外觀為高貴嘅香檳金色,裏面嘅酒紅色絲絨地氈及座椅,更鑲滿施華洛世奇(Swarovski)水晶,係名副其實嘅水晶車廂。車廂裏雖然設有酒櫃,但根據港鐵條例,乘客係唔可以喺車廂飲食,所以酒櫃純屬裝飾而已。

昂坪360董事總經理李殷泰(YT)尋日粉墨登場做推銷員,YT話今次可以話係佢哋同埋施華洛世奇嘅crossover,佢哋仲特別將一號車廂攞嚟豪裝,絕對稱得上係纜車一姐!YT賣花讚花香話,喺豪華車廂欣賞大自然景色係獨一無二體驗,有信心靠新招吸客。

貴賓車廂收費唔平,來回雙程包廂盛惠二千九百蚊,YT話絕對物有所值,因為服務夠晒細心,如果有客人求婚,佢哋可以代為買花甚至求婚鑽戒,佢仲誇下海口話保證百分之百成功,否則原銀奉還喎。車廂下周六開始載客,YT都話好想邀請旅發局主席田北俊嚟試搭,話晒田少樣樣都要最豪,揸車要揸法拉利,搭纜車都自然都要搭貴賓廂啦!