民主黨立法會議員甘乃威被揭發疑求愛不遂而怒炒女助理嘅醜聞，不但成為政界近期茶餘飯後熱門話題，「甘乃威」三個字更加成為Google互聯網搜尋器○九年政治人物搜尋排行榜第二位，力壓人氣旺盛嘅美國總統奧巴馬，仲贏埋「慳電膽益親家風波」纏身嘅煲呔曾，連捲入巨額貪污舞弊案嘅台灣前總統陳水扁，搜尋率都只係排第十。
甘乃威個名所以被網民「打」得火熱，Google方面估計係因為前立法會議員譚香文（Mandy）在電台節目證實甘乃威曾向女助理「示愛」，令事件愈演愈烈，Mandy則順理成章打入排行榜第九位；至於身為女主角嘅前助理王麗珠，亦打入「迅速竄紅搜尋榜」第十位，突然間成為網上紅人。
不過，如果統一各搜尋類別，位居香港最熱門關鍵字搜尋嘅係「豬流感」，市民每天都關心疫情、病徵及最新情況，證明港人八卦得嚟始終都係最關心個人身體健康。