功夫茶貪得意，上網查一查資料，嘩！原來金句已經用咗三十幾年，係廉署七十年代成立初期流傳至今嘅宣傳口號。

八字真言之所以歷久不衰，無他，一來反映保密嘅重要性，二來反映廉署嘅可靠性。你知啦，如果執法機構唔保密，即係普羅大眾冇保障，你點知舉報完人哋貪污舞弊之後，自己會唔會橫屍街頭o架！

好嘞，同樣係執法機構，警方可靠唔可靠呢？保密唔保密呢？密實唔密實呢？唉，講出嚟真係羞家，功夫茶只可以咁講：警方洩密，核核突突。

警方洩露機密資料都唔係第一次咯，家陣洩完再洩。警方內部密件懷疑再一次透過分享軟件Foxy外洩，涉及文件最少六份，包括港島總區反黑組以及重案組○四至○六年之間嘅行動資料。有關資料包括警員同埋被調查人士嘅身份證號碼、手提電話、地址等等。其中一份文件係重案組警員嘅口供紙，詳述拘捕一名涉嫌三合會成員嘅少年。據講，事主嘅姐姐非常不滿，表示會投訴追究，仲聲言：「一定要警方道歉。」

又洩密都算嘞，唔通真係又道歉？功夫茶記憶所及，警隊一哥鄧竟成起碼公開道歉過三次。警員非禮強姦民女，一哥道歉；警員亂擺人肉路障，一哥道歉；警員涉嫌口疏疏洩露臥底行動嘅學校名稱，一哥道歉。

如果迫不得已又要為洩密事件道歉，唔知一哥自己點諗，功夫茶就覺得有兩個問題。第一：道歉完再道歉，好啫！第二：喂，事主係涉嫌三合會成員，假如一哥向佢道歉，好瘀啫！

話時話，其實之前嗰一單臥底洩密事件性質更加嚴重。人哋學校校長一心警民合作，答應畀啱啱學堂畢業嘅警花潛入校園假扮中三女生，上演一幕真人版逃學威龍，本來成功將賣丸仔害細路嘅毒販繩之於法o架嘞，吖，到頭來竟然好事變壞事，唔知邊個大嘴巴爆響口，講咗學校個名出嚟，激到校長生蝦咁跳，召開記者會猛吐苦水，話自己愧對家長，而且連累學生一個二個備受懷疑衰吸毒。

講真，校長始終都係斯文人，若然換轉係功夫茶，反應可能非常火爆，隨時踩上警察總部大興問罪之師：你做初一我做十五，既然有人洩露我學校名稱，信唔信我洩露你逃學威龍警花大寶號吖嗱！

咦，死火死火，諗諗下有少少唔對路，功夫茶話「警方洩密，核核突突」，會唔會大禍臨頭嘅呢？會唔會又拉又鎖嘅呢？之所以會有咁嘅憂慮，係因為忽然之間諗起一個陳年舊笑話。前蘇聯有人當街大鬧一句：史太林係笨蛋！即刻有警察將佢拘捕，罪名係「洩露國家機密」。照咁睇，公開講「警方洩密，核核突突」又算唔算洩露機密o架？希望唔使又拉又鎖啦，唔該。