香港四大商會之一嘅中華廠商聯合會領導層換屆，繼早前選出前基本法委員會副主任黃保欣兒子黃友嘉做會長後，星期一亦進行副會長選舉，新一屆九名副會長之中，出現了四名新嘅面孔，其中陳淑玲係工業界老行尊陳瑞球女兒、廠商會永遠名譽會長陳永棋堂妹，吳永嘉係福建幫頭領盧文端女婿，廠商會第二梯隊開始接班嘅味道濃烈。
我哋打電話盧文端，佢話畀啲後生仔磨練吓啦，上到新崗位有新嘢學，都係好事嚟嘅。咁又係，廠商會近年雄心勃勃，一方面向政府據理力爭分餅仔，捧會董入法定組織，一方面籌劃搞大型智庫同地區辦事處，向直選進發，廠商會未來一班新當家，肯定有大把發揮機會，所以副會長選舉出現十一人爭九個位嘅場面，最後有四位新人入圍，除咗陳淑玲、吳永嘉外，仲有上市公司富士高嘅主席楊志雄，同埋做高質螺絲生意嘅誠興行創辦人徐炳光，廠商會大部分換上新面孔，睇嚟將會有一番新景象。