下星期就同女友拉埋天窗嘅立法會議員涂謹申尋日喺立法會派餅，仲大派印有同未婚妻喺綠野嬉戲嘅年曆，大晒幸福。期間有記者問佢幾時派紅雞蛋，阿涂就面紅紅話：「乜你問埋啲咁敏感嘅嘢呀？」有人追問佢幾時先有生仔時間表，阿涂求其講咗句「使唔使講埋路線圖呀」就閃人。睇嚟大家食完佢嘅喜餅之後，真係有機會食埋佢嘅紅雞蛋喎！
今個月好事真係特別多，另一位議員李華明（Fred）就啱啱喺上海同媽媽擺咗十幾圍慶祝八十大壽嘅壽宴，仲抽咗一個星期同媽媽暢遊上海蘇州，非常孝順。依家係食大閘蟹嘅好時節，佢話日日都有食一兩隻蟹，其中陽澄湖嘅就最鮮味，六両重嘅大閘蟹只需八十八蚊人民幣，仲有人煮埋畀你食，真係抵到爛！不過，搞到佢返到香港之後，有排都唔敢上磅。