為免同人撞衫，立法會議員葉劉淑儀有時寧願帶兩套衫出街，不過佢尋日就有啲失策。尋日一早，立法會出現兩道一模一樣嘅身影，原來係葉太同運輸及房屋局局長鄭汝樺（Eva）不約而同咁着咗件Armani灰色外套，只係個心口針唔一樣，就連葉太自己都講笑話同Eva做咗孖生姊妹。
葉太話件Armani外套係上年喺專門店買嘅，價錢唔過一萬蚊，佢仲話無論議員定高官，要經常出席立法會呢啲正式場合，點都要着得端莊啲，唔可以太潮，「唔通着Prada嘅Bra-top咩？」所以佢以前做官嗰陣，都係成日着Armani，不過近期佢都有新歡，就係Paul Smith同Dolce & Gabbana。
Eva都話工作實在太忙，無乜時間買衫，通常都係去中環百貨公司揀啱就買。佢仲透露，葉太如果知道嗰日會見到佢，好多時都會事先夾一夾，不過尋日工務小組委員會八點半開會咁早，葉太嚟唔切問，咁就撞咗！