本文重點
嶺南大學尋日頒授榮譽院士予六位社會傑出人士，佢哋分別係大家樂集團執行主席陳裕光（Michael）、渣打大班洪丕正、西九文化管理局諮詢會委員黃英琦、香港擇善基金會執行主席陳樂怡同兩位中華總商會永遠榮譽會長何世柱、胡經昌。
嶺大扑頭 全家撐場
Michael尋日得到全家總動員撐場，包括一對仔女浩弘（Robert）同浩寧（Candie）。大家樂係香港數一數二嘅連鎖快餐集團，但Michael話，後生一輩鍾意創業，所以一對仔女都冇幫佢手打理家族生意。
Michael雖然身為香港飲食界巨子，不過佢自言「平時食得好隨便」，而且一星期至少有三日幫襯番大家樂，佢仲趁機賣廣告話大家樂招牌咖喱牛腩同焗豬扒飯係佢「飛佛」添。大家樂喺九十年代急進打入內地，結果蝕到幾乎全線撤退，吸取教訓後，Michael話內地大家樂嘅定位要有別於香港嘅快餐形式，反而要營造一種舒適休閒嘅風格。依家大家樂計劃喺華南地區每年增加十五至二十間分店。