心血管病係繼癌症後威脅人類健康嘅第二號殺手，更加係政界人士嘅宿敵，唔知係咪從政壓力比較大，平日又多飯局應酬，兼夾少時間做運動，政圈唔少人都受心血管病困擾。除咗鬍鬚曾同大舊石，「金勞詹」詹培忠喺○五年做例行體檢時，大命檢查出心臟一大一細血管栓塞，遲啲發現都唔掂，急急做通波仔手術，使咗三、四十萬元；自由黨常委田北辰亦曾經兩次通波仔；前立法會議員陳智思更加因為喺十九歲時患上血管收縮症，曾接受多次通波仔手術。

聽醫生話戒口減肥

立法會尋日開星期三大會，大舊石無現身，原本佢兩日前啱啱做完通波仔手術，正在屋企休養。電話中嘅佢，講嘢陰聲細氣，語調輕柔，一啲都唔似平日嘅大舊石；佢話希望盡快復工，以後會聽醫生話積極減肥，食少啲美食。大舊石可以自己聽電話，證明佢傷勢應該無大礙，不過，聽佢講嘢有啲辛苦，我哋亦唔打擾佢休息，總之祝願佢蒙主施恩，唔使再做第七次通波仔手術。

石禮謙之所以畀人叫「大舊石」，皆因佢腹大便便，身形偏肥，佢自己講過，佢嘅心血管病成因好多，遺傳、飲食習慣、極少運動，乜都有啲。第一次出事發生喺二○○○年九月，做做吓嘢個心突然絞痛，入院檢查發現成條血管塞晒，第一時間開刀，大步檻過，從此定期檢查身體，但心血管病手尾長，通常一、兩年就會「塞番」，難怪大舊石自嘲話，通波仔都通到麻木囉。嘩！如果每次通波仔手術要三、四十萬元，咁大舊石淨係搞條血管都使咗二百粒！各位政界朋友如果唔想好似大舊石咁，身體同荷包同時受罪，以後記住要勤做運動同戒口嘞。