19/11/2009

播放本新聞相關短片

政情:CY唐唐隔空鬥表現

政壇重頭戲政改諮詢揭開序幕,特區政府同泛民未真正埋牙肉搏,兩位疑似下任特首候選人率先過招!政務司司長唐英年尋日掛帥上陣去立法會,一心擔綱演出政改諮詢大龍鳳,不過,被傳同樣有意選特首嘅行政會議召集人梁振英(CY),不讓唐唐專美,尋日同一時間喺銅鑼灣一間酒店發表午餐演說兼大談政改,爭曝光、鬥表現意味濃厚。

香港政制發展北京到實,有意落場跑馬仔選特首嘅人,點可以自絕於政改諮詢大龍鳳?所以,呢場政改之爭,有人話除咗係特區政府同民主派正面交鋒嘅主戰場外,仲有一個次戰場,就係唐唐同CY暗中較技鬥表現,隨着政府尋日公布諮詢文件,二人亦展開首次交鋒。

唐唐不斷重複答案

唐唐尋日打着搶眼嘅紅領呔,連走幾場推銷政改諮詢文件,先上立法會,然後記者會,將傳媒焦點聚焦一身,睇嚟佢亦心知肚明,唔可以再「條條fing」。唐唐不論喺立法會定記者會,都面對連番關於自己係疑似下屆特首候選人嘅質詢,佢都係重複一句答案,只會盡心盡力做好政務司司長工作。

CY演講辭勁似政綱

唐唐喺中環馬不停蹄,佢嘅疑似對手CY亦主動出擊,就喺唐唐下午一點於立法會公布政改諮詢嘅時候,差唔多同一時間,CY亦喺銅鑼灣出席扶輪社午餐會,發表演說,題目係「香港的政治現象、民生面貌和經濟對策」,大談改善貧富懸殊同特區政府所扮演嘅角色,成份競逐特首政綱咁款。

CY一到場,即刻喺記者席坐低,明顯係要主動出擊,就政改諮詢發聲護航,為自己喺呢場政改之戰爭取一個角色。其實,CY要協助推銷政改,喺立法會咪得囉,使乜揀正喺唐唐公布諮詢文件嘅時間,兩個疑似特首候選人同時喺不同地方就同一話題發言,真係好有隔空過招嘅味道!記者問CY,怕唔怕被人話特登同唐唐打對台,CY笑笑口話,呢個午餐會一個月前約好,又話自己選特首,無新消息公布。CY演辭完畢,飯都唔食趕去立法會,仲趕得切聽埋唐唐嘅尾段發言,佢全程好似觀察對手一樣實唐唐,社民連陳偉業質疑唐唐為競逐下任特首自設選舉制度,有議員大嗌,指住公眾席上嘅CY,「上面仲有一個!」CY無否認,只係笑到見牙唔見眼!