不如咁啦，睇睇最新一份民意調查到底講乜東東先啦。

港大民意研究計劃喺十月二十至三十日，透過真實訪員以隨機抽樣方式，成功以電話訪問一千零五名香港市民，發現對比兩個月前，市民對特區政府嘅信任程度冇明顯變化，不過，不信任比率就大幅上升十四個百分點，達到兩成八。至於中央政府以及台灣政府，信任程度分別上升百分之四同埋百分之五。簡單咁講，香港市民信京老爺政府多過信煲呔曾政府。

民研計劃總監鍾庭耀指出，市民信任北京政府多過特區政府嘅情況，喺二○○一年十月首次出現，延續三年半至二○○五年四月先至逆轉。鍾庭耀認為有關現象嘅深層意義值得深思。

既然係咁，深思深思……大家一齊瞇埋雙眼，一齊開動腦筋，深思深思……深思深思……

有人可能會話，唓，使鬼深思咩！自從曾蔭權發表咗一份不得人心嘅「無糖」施政報告，裏面更加涉嫌利用慳電膽現金券益親家，然後又爆出雷曼弟婦特快賠償，佢自己嘅民望梗係跌到阿媽都唔認得啦，畀佢搵過老襯嘅市民當然唔信政府啦！

呢嗱嗱嗱，呢個講法當然絕對成立。搵人老襯其實唔係大問題，但凡政治家都係騙術高手㗎啦，最緊要係唔好穿煲吖嘛，一個唔覺意穿咗煲又唔好發爛渣吖嘛，煲呔曾含血噴人誣衊傳媒「肆意攻擊」，民望插水的確係好正常嘅事，政府不受信任亦係理所當然。之不過咁，功夫茶深思嘅課題其實唔係呢家嘢，而係另一樣：家陣就話香港市民信京老爺政府多過信煲呔曾政府啫，遲啲咯喎，會唔會連京老爺政府都受到質疑㗎？你知啦，煲呔曾係北京一手揀出嚟嘅，即係「用人唯曾」，結果做到不受歡迎，好容易累街坊㗎咋，累到市民唔信阿爺就大件事咯！

政府信唔過，其實仲有好多事例。譬如話喺西九興建高鐵總站咁吖，無厘啦更動用六百五十二億天價，平均每公里耗資二十五億，隨時列入世界紀錄，貴到冇朋友之餘，效用仲係一大疑問。喂，有人計過數喇，如果改喺元朗錦上路興建高鐵總站，成本可以節省三百億，攞去救濟一百二十三萬窮人都不知幾好使。

話時話，施政報告不得人心其中一個原因正正就係曾蔭權完全漠視窮人需要，隻字不提扶貧措施。所以咯喎，市民有眼睇㗎，見你興建高鐵可以一擲千金，救苦救難硬係一毛不拔，信你真係「民心我心」先至奇啦！