「媽打」李麗娟自九月籌辦完同齡同心籌款晚宴後，至今已近個半月，呢段期間媽打主要喺美國同加拿大之間飛嚟飛去，除咗慎終追遠拜祭媽咪外，仲同四十八個分布喺美加唔同地區嘅幼稚園舊同學，慶祝大家六十歲生日，連幼稚園同學都可以維繫至今，網絡仲勁過交際網站，真係要寫個「服」字！
媽打回港無耐，迅即出席一個慈善活動，見媽打挽住個紙袋神神秘秘，周圍問人梁錦松喺邊，當時只得阿松老婆伏明霞在場，媽打就直接將袋嘢交畀小伏。為乜咁神秘呢？原來阿松秘密託媽打喺一個慈善活動買咗套首飾送畀小伏。阿松話，由於平時比較忙，又經常不在港，所以咪買禮物氹吓老婆囉！
其實小伏同媽打好熟落，小伏以前喺清華大學讀書時，巧遇當時做官嘅媽打上國情研習班，媽打難得見到偶像跳水王后，當然即時打招呼啦！小伏憶述，當時見到好多人上研習班，但最深刻係媽打甜美嘅笑容，難怪一見如故。媽打亦禮尚往來大讚小伏笑得甜，大家互送高帽笑呵呵。