克勤仔話做咗議員咁耐，有好一段時間無見過班舊戰友，咁啱今次有機會「舊地重遊」，一早就諗定到時去探吓舊戰友。不過尋日克勤仔就「兩梳蕉」上去敍舊，佢話一嚟唔好意思拎住咁多嘢同煲呔曾食飯，二嚟佢啲舊同事唔係點食零食，所以去同佢哋吹水就算數喎！見番舊戰友，唔知有無懷念番以前嘅日子呢？克勤仔話兩個職位處境好唔同，好難比較，不過肯定嘅係，佢監察政府嘅力度未強烈到令佢班舊戰友怨恨佢喎！

尋日唔同政黨嘅代表都有到場，席間雖然和和氣氣，但就揭露咗一眾副局長知名度奇低嘅事實。經濟動力嘅梁君彥尋日諗番有邊幾個高官同佢同枱時，就點都噏唔出環境局副局長潘潔個名，最後仲要記者提醒先記番起；民主黨李永達就將民政事務局副局長許曉暉叫錯做「許兆暉」。連同政府溝通最多嘅立法會議員都對副局長近乎「零認識」，呢班個個年薪過百萬嘅高官，真係要好好檢討吓嘞！