尋日明明姐做創會主席嘅「國際斯佳美容協會——聖廸斯哥中國分會」舉行《29週年紀念暨2009-2011年度執行委員會就職典禮》，着住白色制服嘅明明姐精神奕奕，對眼仲好精靈，原來佢左眼啱啱打完Botox，明明姐話佢搵專業醫生幫佢打，所以好安全。

和而不同嘅劉燕卿就唔敢試呢啲注入體內嘅美容針，因為覺得風險高，無百分百保證。身為消費者委員會總幹事嘅佢，仲不忘幫自己省招牌，話消委會係用最科學同最中肯嘅方法測試產品，佢試過用錯護膚品搞到皮膚敏感，醫足幾個月先斷尾不特止，仲要每日搽勁厚粉遮住先敢返工，所以依家佢會好小心揀牌子，唔會立亂信口碑，只會信科學結果。

鄭明明掃滬物業

同場嘅立法會議員方剛就話，喺地產同股票帶動下，衰咗大半年嘅零售業九月終於有起色，但早排地產界同財爺開完會話壓樓巿，個零售業又跌番，所以佢自己對重建居屋都抱觀望態度。香港樓市前景不明，喺上海有百畝地開廠嘅明明姐就話上海樓買得過，佢依家手上有五、六個優質上海樓盤，加上上海勢頭好，嚟緊會繼續喺上海掃物業。

卓妮