「崑曲」自○一年被列為人類口傳非物質文化遺產後，隨即人氣急升，但發展只局限於內地同台灣兩地。為傳揚中國文化，志蓮淨苑近兩年積極推動崑曲，繼去年邀請台灣蘭庭崑劇團喺南蓮園池演出《蘭庭六記》經典折子戲後，今年再添食演出《長生殿》精華版。卓妮聽聞好多名人去年首次欣賞崑曲後讚不絕口，今年會撲飛再睇過。
下周上演《長生殿》
志蓮淨苑「大義工」、立法會議員梁劉柔芬（Sophie）近年醉心崑曲，尋日煲呔曾喺禮賓府宴請全體立法會議員，但係Sophie都要請煲呔曾食檸檬，反而去南蓮園池介紹下周五起上演嘅崑劇。Sophie話，崑曲抒發情感方面好開放，而喺南蓮園池呢個咁幽靜嘅環境近距離欣賞崑曲，感到有種平靜感，聽曲後個心好清，有洗滌煩囂之效。至於今次嘅重頭戲《長生殿》劇目，係敍述唐明皇同楊貴妃嘅愛情故事，文辭優美，音律協和，難怪Sophie話陶醉於古琴音色下，恍如回到唐代宮廷一樣。
喺美國買老花鏡
南蓮園池今年三場崑曲折子戲《牡丹亭》、《紅梨記》、《繡襦記》及《長生殿》精華版將於本月十三至十五日演出，三場共提供三百六十張門票，門券包括崑曲導賞講座，今年特別提供電話及送票服務，由於門票有限，所以有興趣就趁手嘞！
講番Sophie，卓妮偶然發現佢隨身帶備一副纖巧型老花鏡，戴上去都唔多覺眼，佢話五年前購自美國西雅圖，盛惠六十四美元（約五百港元），但一年後喺網上發現有地方平到二十美元（約一百五十六港元）三副，後來仲發現喺深圳賣一百元人仔六副添，證明大家學嘢都幾快！
卓妮