立法會議員陳淑莊（Tanya）尋日喺立法會大會上，就會展第三期擴建計劃向商務及經濟發展局局長劉吳惠蘭（Rita）提問。不過，Tanya喺短短二十分鐘嘅口頭質詢中，竟然相繼畀議員同官員戲謔，先係Rita暗寸佢立法會新丁唔熟書，之後又被人稱ＩＱ博士嘅立法會商界代表黃宜弘笑佢：「陳議員做咗前立法會議員蔡菜子（蔡素玉）嘅替身。」搞到Tanya會後扁晒嘴話畀人窒。
ＩＱ博士話Tanya係蔡菜子嘅替身其實並冇惡意，之不過蔡菜子做立法會議員期間主力跟進會展事宜，所以先產生咁嘅聯想。
另外，Tanya發言時引述報道指政府喺○三年一份內部文件中曾提到，如果亞洲國際博覽館嘅額外十萬平方米展覽場興建後，仍然未能滿足展覽需求，先考慮興建會展第三期，質問政府係咪有此承諾。點知畀Rita當眾揶揄佢，話份文件唔係啲乜嘢機密，當局早喺○四年十月已經提交畀立法會，不過「陳議員可能新加入立法會唔知道」。Tanya事後反唇相譏話自己從來都冇話過份文件係機密，之後仲要七情上面咁話：「耶！局長窒人！」