本文重點
女童軍總會前晚舉行周年聚餐，作為女童軍嘅名媛靚太出心出力支持。好似玩具大王蔡志明太太蔡李惠莉，為咗同教育局局長孫明揚合唱電影《歌聲魅影》歌曲「All I ask of you」，特登搵師傅訂造一件紅色長裙，一上台艷光四射，舉手投足都同孫公好有默契，將歌曲浪漫情懷盡情發揮，原來兩人事前無練習，全靠打天才波。
教育局近排工作好忙，所以孫公事前真係抽唔到時間同蔡太夾歌，但估唔到合唱效果可以咁正。同卓妮一樣聽出耳油嘅孫太，喺台下拍爛手掌，之後仲同蔡太囝囝蔡加讚一齊到台前獻花，場面非常溫馨。
孫太通頂布置場地
孫公打完天才波，就輪到孫太同班老友上台合唱金培達創作嘅《始終有你》，大家唱到興高采烈。不過，孫太就大呻《始終有你》咁好一隻歌，政府都唔識好好廣泛宣傳，認真嘥晒。又好難怪孫太咁講嘅，事關首歌一早畀網民改寫歌詞嚟鬧政府施政，結果熱爆全城，好多人已經忘記咗原曲嘅歌詞嘞！
卓妮收到風，孫太係今次晚宴場地布置嘅幕後功臣，由於佢負責場地統籌，佢喺晚宴當日凌晨兩點幾就到尖沙咀洲際酒店會場，指揮工作人員布置，須知道呢個時候係皮膚休息嘅黃金時間，但係孫太寧願放棄「養顏」都要捱更抵夜，唔怪之得有咁多friend啦！