關注車禍家屬訴求

素顏現身嘅徐子淇坐足全程聽死者家屬訴心聲，不時流露關愛眼神，家屬見呢位星級新抱咁有愛心，都顯得好感動。Jaime話，呢班家屬喺車禍發生後表現得既堅強又團結，仲坦言外界對佢哋嘅援助已非常足夠，三餐唔成問題，嚟緊最希望政府從慘劇中吸取教訓，加重刑罰嚴罰醉駕司機，避免悲劇再三發生。Jaime坐言起行，稍後會約見勞工及福利局局長張建宗反映紮鐵工人休息不足嘅苦況，希望當局關注為工人爭取合理嘅休息時間。

Jaime同車禍家屬真情對話後，尋日下午又以菁英會主席身份出席喺奧海城舉行嘅雲南攝影展，同場仲有菁英會副主席盧金榮。講起近日金價勁升投資乜嘢最划算，盧金榮話，金粒就唔買嘞，反而睇好同環保能源有關嘅股票將會成為大熱，所以入市買咗少少，入貨數量同價位就唔講嘞。