其實Ron又點會志在嗰一年米飯錢呢？佢養過馬王「翠河」，對於其他愛駒都有好大期望就真。對於「唔志在」呢個講法，佢反應奇大咁話︰「你講笑好！唔志在？佢起碼要搵錢夠養自己先得㗎！」呢輪馬會啲「糧草」畀人話貴，Ron呢番說話令人產生聯想。點知Ron跟住就話︰「最近有個馬房職員同我講，話我隻馬最近表現唔錯，話有機會（贏）。下星期佢得唔得？我要同練馬師傾吓，希望佢旗開得勝。」哦！咁既然有機會，即係無白養囉！

黃至剛撐馬會人工合理

馬會行政總裁應家柏年薪千四萬，卓妮喺馬場見到前任馬會ＣＥＯ黃至剛，問佢馬會錢係咪好易搵？佢四両就撥咗千斤︰「梗係好搵，馬會係間一百二十五年嘅老店。現任主席話人工合理，我都覺物有所值，馬會喺全世界招聘，無咁嘅人工點吸引到專才嚟打理。」卓妮隨即見到應家柏，梗要問佢點先可以好似佢咁rich？佢好謙咁話︰「我唔rich，我好簡單，只要好似卓妮一樣咁勤力工作就得啦！」耶……人哋卓妮年薪邊有千四萬喎！

另外大班梁高美懿同老公甜蜜蜜入馬場，梁太話下個星期會同金管局總裁任志剛farewell，又話同候任嘅「攞命陳」合作咗好耐，所以好熟。

黃至剛偕妻（中）入馬場，大撐現職馬會高層年薪物有所值。 （葉華英攝）	發叔（左）與劉業強忙裏偷閒到馬場與老友食飯敍舊。 （何偉鴻攝）	梁高美懿與丈夫拍住拖一齊到馬場。

劉業強家長指引教賭博

鄉議局主席劉皇發就同大仔劉業強一齊嚟，劉業強話唔會落重注，入嚟志在同朋友聯誼。今次發叔無帶埋孫仔入嚟，劉業強話佢哋開咗學要溫習，不過就算入馬場都唔怕佢哋學賭，反而可以等佢哋明白賽馬除咗係賭仲係運動，賭唔賭就等佢哋大個自己決定。佢仲話家庭教育好緊要，禁小朋友賭唔係好事，反而有家長陪住指引仲好。

卓妮