本文重點
前香港小姐兼息影藝人吳夏萍（Ellen）大女賴楨敏（Jacqueline）認真威水，皆因佢今個月頭去咗北京，參加「二○○九全國馬術場地障礙賽」，仲攞咗個冠軍返嚟，成為香港首個喺呢個比賽度奪冠嘅選手。
全國賽完美零罰分
呢個比賽係由中國馬術協會舉辦，今屆係首次有香港選手參賽。卓妮打聽下先知，其實Jacqueline同其他香港賽馬會青少年馬術隊嘅成員一樣，目標係嚟緊十月底喺山東舉行嘅第十一屆全運會。為咗可以順利比賽，Ellen一家人認真肯落本，特登喺內地買咗隻馬，避過內地繁複嘅馬匹入境檢疫，等Jacqueline可以專心喺北京訓練，所以Jacqueline今次先可以參加全國賽，順便為下個月嘅全運會熱身。
Jacqueline喺今次嘅全國賽中奪冠真係唔容易，佢參加嘅係場地障礙賽一點四米欄級別個人賽，啱啱喺德國受訓一個月返嚟嘅Jacqueline同呢班來自廣東、上海、新疆等全國各省市嘅選手經過兩輪嘅激戰後，終以完美嘅零罰分成績擊敗廿五個對手，成為本港第一個喺呢個比賽拿冠軍嘅選手。
咪睇Jacqueline得十八歲，查實佢已經參加過唔少國際賽事，但舊年就因為太年輕，同仲未參加過合奧運資格嘅國際賽而無緣現身於奧運，希望佢喺嚟緊嘅全運會都有好成績啦。
卓妮