沙田馬場尋日搞咗個一百二十五周年活動嘅預告活動，搵咗詠春大師葉準率領馬會義工隊同社區人士一齊示範社會推廣嘅「香港得得得」運動十式，唔識詠春嘅馬會大董葉錫安（Simon）同范徐麗泰都手郁郁跟住做。
本身係律師嘅葉錫安啱啱喺北京返嚟，原來佢之前去咗北京面試法官，事關城市大學同最高人民法院搞咗個課程，培育內地法官，佢哋喺五十幾個法官裏面篩選三十幾個出嚟學英文，幾個月後再篩剩三十個，上一個法律碩士課程。
要一關一關咁過，幾乎仲難過超級女聲，Simon都話︰「唔易㗎，佢哋全部都係精英，嚟自十七個省，個個都只得二、三十歲，希望十幾年後佢哋都可以做到最高人民法院嘅法官啦。」佢話依家國家嘅司法仲係落後，同發展唔係好配合，所以培育法官係好事嚟。
至於范太佢話自己唔識詠春，反而識太極，不過都已經係好耐之前嘅事。咁既然以前耍太極咁叻，唔知范太有無應用喺佢嘅工作上面呢？范太︰「無無無，我個人都好直腸直肚。」不過心胸就畀四個大字塞住咗，就係「大公無私」。