24/08/2009

播放本新聞相關短片

政情:愛女九大簋 慶葉劉生日

立法會議員葉劉淑儀今日生日,葉劉愛女葉榮欣(Cynthia)前日提早同佢搞咗個生日會,仲請埋一班葉劉喺史丹福大學嘅同學一齊慶祝。生日會籌備工作落喺Cynthia手上,大家一齊睇佢有啲咩搞作。

為咗令媽媽有個難忘生日,Cynthia除咗預備拿手嘅雞尾酒,仲預備埋九大簋,不過就係外賣嘅居多。第一味係葉劉指定嘅入境處飯堂豉油皇乳鴿,原來佢唔做入境處處長之後,一直對呢隻鴿念念不忘,Cynthia當然買嚟孝敬媽咪。其他主菜包含各國風情,包括越式小食拼盤、印度咖喱雞、泰式海鮮金邊粉同葉劉最愛嘅壽司。

葉劉感動畀一百分

Cynthia前後用咗四個鐘,花咗二千幾蚊,游走灣仔、金鐘同中環,終於買齊其中六樣主菜,返到屋企喺菲傭協助下,完成埋墨西哥薯片同美式沙律同炒雜菜等菜式。

生日會一開始,葉劉畀滿枱食物嚇咗一跳,佢除咗好感動,仲有種「吾家有女初長成」嘅感慨。其實一個人搞十二人嘅飯局都唔簡單,除咗食物,餐具亦係一個難題。Cynthia喺生日會前一晚先發現唔夠匙羹用,所以喺買嘢食之前拿拿臨去入貨。呢啲小事都咁細心,難怪葉劉話想唔畀一百分都唔得啦。