工業貿易署署長黎以德後日（十七日）就返新工，平調去運輸署開始署長生涯。尋日佢最後一次以工貿署署長身份出席業界活動，擔任第一屆香港潮流精品展開幕禮嘉賓。外界盛傳佢呢次調職其實係升官前奏，佢就玩閃避，冇正面回應傳聞。
黎以德去年升正首長級第六級（D6），轉眼又調任運輸署，傳聞話佢嘅新上司、運輸及房屋局常任秘書長何宣威明年退休，黎以德有機會上位做常秘，佢尋日聽到升職傳聞，隨即以「今日仲係工貿署署長」嚟回應，冇承認亦冇否認。咁又係，升職加薪呢啲敏感話題都係小心啲講嘢好，事關一日未上任，一日都可能有變數。
講番尋日個精品展，黎以德同貿易發展局總裁林天福一齊做開幕禮嘉賓，順道逛一逛精品展。精品展嘅展品包羅萬有，由床上用品到鐘錶都有，臨別秋波嘅黎以德，用八達通嘟咗四十幾蚊撐業界，喺自動售賣機買咗把可以遮風擋雨嘅縮骨遮，仲試埋好使好用嘅手提電鑽。行過一個以港式風景做主題嘅模型攤位時，佢仲問負責人啲模型咁有香港特色，國際市場受唔受落㗎？算係調職前嘅傾力演出。