星期一下午兩點左右，卓妮路經中環畢打街，迎面而來見到Pauline推住架ＢＢ車，穿梭中環鬧市自得其樂。卓妮上前打招呼，Pauline馬上介紹身旁嘅囡囡Cynthia及兩歲半孫女Ellery畀卓妮認識。Cynthia喺英國讀考古，依家喺香港藝術館做嘢，同媽咪成個餅印。Ellery兩歲多啲，留長頭髮，生得特別高大，着住條裙仔精靈可愛，五官長得好標致；Pauline話呢個外孫女性格好骨子，樣樣都要整整齊齊至開心。

講故事變魔術氹小朋友

Pauline約咗囡囡喺中環會合後，再去囝囝家中湊孫，Pauline嘅私房Playgroup又可以開檔喇。Pauline係工作狂，同樣令佢暈晒大浪嘅就係佢三個孫仔孫女，每逢星期日中午飲完茶，佢都帶班小朋友返佢屋企講故事或者變魔術等，次次都有驚喜，係一個為三個小朋友度身訂造嘅私房Playgroup。佢嘅仔女新抱女婿安心放低小朋友，就可以偷得浮生去拍拖喇。

卓妮