現年三十三歲的羅先生患有痛風症多年，過去一直向私家醫生求診。今年六月底，羅因痛風症突然發作，在瑪嘉烈醫院急症室轉介下，於七月中旬前往東涌健康中心普通科門診接受診治，並獲醫生處方別嘌醇（Allopurinol）及止痛藥物，「我見醫生嗰陣，已經同佢講我隻腳好痛，但係佢好似冇聽到，睇唔夠三分鐘就叫我拎藥走。」

缺乏醫學基本知識

羅服藥一天後便出現全身腫痛，須急召救護車往瑪嘉烈醫院急症室求診，結果需留院五日觀察，「瑪嘉烈個醫生話我唔應該食嗰隻藥（別嘌醇），食咗搞到啲痛風發得仲勁，我覺得門診個醫生根本冇搞清楚我個病情就開藥，真係好過分！」為免病情惡化，羅現時仍須定期往醫院覆診，「由我第一次食隻藥到依家，成半個月都開唔到工，隻腳仲好痛，行路仲跛吓跛吓，呢隻藥真係害得我好慘！」

「痛緊嘅病人唔應該食別嘌醇，如果食咗仲會差啲，成身都好痛！」本身為傳染病科專科醫生的全民健康動力主席勞永樂指出，別嘌醇有防止痛風發作之效，但同時會導致尿酸不穩，不適合病發中的痛風症患者服用，質疑醫生有處方藥物出錯之嫌，「點用別嘌醇係醫學嘅基本知識，但好多醫生冇留意點用，呢啲case（個案）我一年都見到幾個！」

資源不足事故頻生

病人互助組織聯盟副主席張德喜認為，醫生每日面對眾多病人求診，如果無暇了解每名病人所需，只依循慣例處方藥物，隨時會出事，「醫管局一日唔增加資源，呢個問題都有機會發生！」

對於處方錯誤藥物導致羅先生病情惡化之指控，九龍西醫院聯網發言人未有正面回應，只解釋醫生為病人檢查身體狀況後，發現血液中的尿酸鹽高於正常水平，加上病人有多次痛風症復發紀錄，經考慮後遂處方別嘌醇及美辛（Indocid）治療病人因痛風症引發的問題。

別嘌醇副作用須謹慎處方

醫學會會董馮宜亮指出，痛風症主要因酗酒及食用高蛋白質食物引致尿酸上升，加上腎臟未能排出過多尿酸，導致尿酸鹽沉積在關節內，令關節發炎。痛風症患者一旦病情惡化，或會引致腎衰竭及中風。由於服用藥物因人而異，醫生必須經過詳細診斷才可處方，「好似別嘌醇咁，呢隻藥的確有防止痛風功效，但係有啲病人唔啱食，食完會有敏感反應，可能會成身腫晒。」

記者 梅可茵