又係別嘌醇惹禍，不過呢次唔係因為毛霉菌，而係懷疑醫生開錯藥。有位羅先生患痛風症多年，一直睇開私家醫生，兩個月前病情突然發作，要去瑪嘉烈醫院睇急症，之後被轉介去東涌健康中心普通科門診。一見醫生，羅生話明隻腳好痛，對方似乎冇心裝載，睇唔夠三分鐘，就開咗啲別嘌醇叫佢走人。

點知食咗藥一日，羅生就全身腫痛，要Call白車入急症室，仲要留院觀察五日。點會搞成咁？據急症室醫生講，別嘌醇會令痛風發得更勁，根本唔應該食。羅生因為呢隻藥，痛到半個月都開唔到工。

食藥食到痛上加痛，有冇離譜啲吖？全民健康動力主席勞永樂話，別嘌醇只有防止痛風發作效用，但同時會導致尿酸不穩，並唔適合病發中嘅痛風症病人服用。佢質疑有關醫生可能處方藥物出錯。照計，東涌健康中心嘅醫生唔會連呢啲基本常識都唔知，唯一解釋就係，佢哋根本未搞清楚病情就求其斷症，亂咁開藥。醫生咁冇責任心，公立醫院醫療事故有乜辦法唔愈爆愈勁吖。

講開醫生責任心，功夫茶當堂火都嚟埋。嗱，好似本報前日報道嘅二十一歲大學生離奇死亡個案咁，屋企「九代單傳」嘅昌仔，十二歲患咗惡性胸腔瘤，之後一直受多種惡疾折磨，咁多年來佢咬緊牙關面對一次次無妄之災，係家人同朋友眼中嘅生命鬥士。

點知生命力再頑強都鬥唔過官僚僵化嘅醫療制度。昌仔前年喺屯門醫院驗出患骨髓異常增生綜合症，妹妹嘅骨髓證實同佢互相脗合，醫生話救得番。佢滿懷希望等住做骨髓移植手術，點知等咗五個月都冇消息。

舊年年初病情突然轉差，昌仔至發現醫院已將自己列為非緊急個案，根本冇幫佢排期做手術。希望幻滅，病情繼續惡化，昌仔舊年三月救治無效，離開咗呢個世界。

醫護人員疏忽職守，冇責任心，等住救治嘅個案變咗非緊急個案，有得救變冇得救，呢個就係公立醫院嘅現實。屯門醫院近年醜聞不斷，舊年年初，爆發咗本港首宗病人因輸血感染螢光假單胞菌致死事故；前年年底，又畀本報踢爆，有醫護人員將兩個婆婆嘅血液樣本標籤掉轉，導致其中一人飲錯鉀水，差啲冇命。醫管局事後居然話無導致病人傷亡，唔屬嚴重醫療事故，所以無主動公布事件。

醫管局唔負責任，上樑唔正，下樑歪硬啦。公共醫療體系「頭重腳輕」，資深嘅醫生都升職做管理層，前線醫務人員工作壓力大又經驗不足，管理規章同指引混亂，遲早會出事。計功夫茶話齋，掌管醫療嘅食衞局局長周一嶽自己都渾渾噩噩，有佢喺度，公立醫院點會唔亂，病人邊有運行吖？