伍威全嘆生意難做

李德麟同卓妮大談食經，話寧波菜屬於滬語系菜式，多數食材為海鮮，味道偏鹹，好多都係醃咗以方便儲存，著名地道寧波菜式有鹹菜黃魚湯、海蜇頭、炒蝦仁及烤菜等，當中最矜貴就係黃魚，好大條，香港要賣幾千元一條，而內地野生黃魚一條亦要幾千元。

其中海蜇頭和炒蝦仁在雲咸街上海總會有得食，李德麟話總會嘅生意唔錯，依家諗緊研究將上海菜與廣東菜融合，變成Fusion菜。

卓妮聽過唔少飲食業界話搵食艱難，唔變陣搞噱頭實在好難生存。全國政協常委伍淑清胞弟、香港食品委員會副會長伍威全都話，近期食物原材料價格上漲，面對茶餐廳成行成市，好似佢哋集團式快餐店都面對好大競爭，又擔心加價會令市民改到超市買餸煮飯，所以生存有一定難度，只能以平常心面對。

卓妮轉頭喺個國際茶業市場會議又見到香港咖啡紅茶協會主席、「大排檔」餐廳老闆黃家和，其家族經營紅茶已有五十幾年，最近佢做過統計，香港每日消耗紅茶葉高達十六噸，相等於沖二百五十萬杯奶茶，每日平均三個人就有一人飲奶茶，相信係世界之冠。

卓妮